Am 12. Januar si mer no mit ischränkige is Turnjahr 2022 gstartet. Nach der HV am 26. Januar isch der erst Fixpunkt uf em Jahresprogramm ds Skiweekend uf der Elsigenalp gsi. Am Samstig Morge het mer nid so viu bis gar kei Sicht gha. Aber uf d 11i Charte hets uftah u somit hei mer o uf d Ski chönne. Nach eme schöne Ski Halbtag hei mer es feins Nachtässe chönne gniesse u no chli gspielt. Am Sunntig Morge isch ds Wätter guet gsi u somit si mer sofort uf d Ski wiu der Wätterbricht isch uf e Mittag num so guet gsi. Es het de afah lufte u de hei mer no öppis trunke u hei üs ufe Heiwäg gmacht.

Am 16. Februar si mer uf Worb gah Isstockschiesse, u am 21. April uf Spiez gah Bowling spiele. Das si gäng lustigi Aläss.
U de isch es witer mit Turne gange bis zum Schulfest. Merci Christine fürs vorbereite vom Schulfestumzug.

Am 6. Mai si mer am Frühligswettkampf ds Amsoldinge gstartet. Mit em erste Wettkampfteil si mer nid ds friede gsi derfür isch der 2. Besser gsi.
Am 7. Mai isch d Barbara mit 15 Meitli uf Amsoldinge. 8 Meitli hei e Podestplatz erreicht. Ds Amsoldinge cha mer sech im 1000er no für e schnällst Oberländer qualifiziere. 7 Meitli hei das gschafft. Härzlechi Gratulation u e Dank at Leiterinne.

E Woche später het der UBS Kids Cup ds Uetedorf stattgfunde. Dert isch es gäng e chli schwieriger e Podestplatz ds erreiche wiu der LV Thun d All Blacks Thun oder süch anderi LA Vereine o mitmache.

Bi heissem Wätter hei mer am 18. Juni üse Trainingstag düregfühert. Am Morge FTA Allround u am Nami der FTA-Volleyball. Am Abe isch mer i Krone Uetendorf zäme gah Znacht ässe.

Ir Woche vorem Turnfest u am Turnfest si verschiedeni Turnerinne uf Frutigen gah ihre Häuferisatz leiste. Härzleche Dank allne wo mitghoufe hei. Am 2. Juli si de die aktive as oberländische Turnfest uf Frutigen greist. Mit em 26. Rang vo 45 teilnämende Vereine ei mer es asprächends Resultat turnet. Merci viu mau fürs Organisiere u ds Turne.

Bi schönem Wätter hei mer üs am 6. Juli bi Iseli’s zum Brätliabe troffe. Es isch ganz e gmüetleche Abe gsi. Merci Michaela für e Platz zur Verfüegig stelle u der Christine fürs organisiere.

Am 10. Septämber isch der Westamt ds Uetedorf gsi. Einisch e chli anders da der TV a däm Datum sis Jubiläum gfiiret het. Am Morge hei d Ching ihre Wettkampf gha u am Nami die Aktive.

Am 18. Septämber isch der Vereinsusflug ufem Programm gsi. Mer si mit em Zug uf Solothurn u hei dert zäme Zmittag gässe. Nachhär hei mer üs uf der Suechi nachem Daniel gmacht. Mit verschiedene Hiwiese wo üs dürs Städtli gfühert hei, hei mer der Daniel gfunde.

2. Novämber Träffpunkt Riedere Turnhalle, turne mit der MR isch ufem Programm gsi. Es guets Iturne, lustige Spieli u e schöne Volleymatch es isch super gsi! Merci viu mau.

Bir DV ds Steffisburg am 10. Dezämber hets nid viu Nöis gäh ussert das der Oskar Marggi als Präsident uf die nächsti DV zrüggtritt. D Suechi isch schwierig u der TBO het zur e Findigskommission iglade zum luege wies söu witergah.

14. Dezämer Wiehnachtshöck mit Fondue u Lotto bi Iseli’s.Es isch e gmüetleche Abe gsi. Merci aune Häuferinne.

Am 23. Ougust het bir Stephanie u am Simon Tiefenauer der Lior Benaja ds Liecht vor Wält erblickt. U am 28. Ougust isch bir Sabrine u em Michael Sommer d Meret uf d Wäut cho. Ganz härlechi Gratulation!
Zum Schluss möchti öich Turnerinne de Leiterinne u der Vorstandsmitglieder ganz härzlech für die gueti Zämearbeit danke u wünsche es unfallfreis 2023.

Uetendorf 24. Januar 2023,
D Präsidentin Carmen Zingg